Kirjoittaja: Leena Rundgren

Olin yläluokala kansakoulussa ja joilaki tyttärillä alko niinkö tulheen kurveja, mutta mie, mie se vain olin plattana.

No net voimistelutunnit olikki sitte vähän vaikeita, minun mielestä, muut piiain perustanheet minun laihuuesta, mutta mieki halusin kurvit. Ei kuulunu eikä näkyny.

No yksii kerta mie keksin omasta mielestä hyän idean. Nyt jälkhiin sanosin ette ei tainu olla nuoressa päässä oikhein järkeä.

No, mie otin äitiltä ruskeat sukat, semmoset mikkä sukkanauhoila panthiin kiini houshuin tai oliko semmonen nauha lantiolla kansaa.

Net sukat olit tukevat ja helppo tehä rullat niistä. Pyörittelin ja survoin ette olis jotenkikhaan pallon näkösiä. Kähvelsin ison siskon tissiliivit, ja pistin sukkapallot sinne, pusero pääle ja niin kurvit synnyit, vähä liian isot, ette yhessä päivässä kasuta, mutta sitäkös mie aattelin.

Kouhluun menin leuka pystyssä, nytte poka, käykö katheeksi kaverit? Mulla onkii issoimat!

Oli voimistelutuntiki sopivasti justhiinsa ensimäisenä minun kurvipäivänä.

Voimistelupuku pääle, mulla tieten tissiliivit ja sukkapallot niitten sisälä ja voimistelupuku sitte piti niinkö sukkia paremin paikoilhaan.

Hyppy hyppy heihlautus, hyppy hyppy heihlautus, hyppy hyp… joku ruskea pallo vieri kaikitten silmien eessä laattialla äänettömänä mutta hyvin selvästi ikkunasta tulevien auringonsätheitten loistheessa näkyvänä sukkapallona.

Mitä, mikäs, opettaja muka ihmetteli, ja muukki tuntu olevan suut auki ko järkhiin ei käyny ette sukkapallo jostaki pyörii nurkkaa kohen...

Opettaja tiesi, näkihän se ko mie tulin tunnile, ei tissit yössä kasua.

Ja mie, mie sieppasin naama ko tomaatti pallon laattialta ja istuin ikkunalauale ja vahtasin yli Tornionjoen Ruottin puolele, enkä liikkunu tuumaakhaan, ennenkö liikuntatunti oli ohi.

Mie ja minun ihmetissit, en halua ees aatella kunka hävetti, mutta opettaja Inkeri tieten kielsi muita olehmaan hiljaa, niinkö ei mithään olis tapahtunu.

Tomaattiväri haaleni naamalta päivän aikana ja tissipallot menit rephuun niinkö menit siskon tissiliivikki.

Kurvit tulit, kurvit menit, putosit laattialle koulussa kaveritten ja opettajan silmitten eessä. Voi hyvvää päivää!

Miksi mie pöljä een testanu ens kotona, sitä mie olen hunteerannu joskus.

Äiti ja sisko eikä kukhaan perhheestä saanu tietää minun tissikeksinöstä.

Koulukaverit ja opettaja näit ette yhessä yössä oli tissit kasunu, vastoin luonnonlakia, net tiesit ette pluffia koko homma.

Mie een ollu täysissä nuoruuen järissä, ko uhmasin kehityksen kulkua, mikä nuoruuessa muuttaa plattanan pyöreäksi, ajan kansa.

Voi Herra hyästi siunakhoon, ois isä mainonu jos olis tieny.

Nuohruus ja hulhuus.

Sivustolla käytetään evästeitä, jotta voimme varmistaa sivuston toiminnan sekä mm. kävijäseurantaan. Hyväksytkö evästeiden käytön?
Lisätietoja OK - sulje ilmoitus En hyväksy