Kirjoittaja: Kirsti Runavik

Minun mies kirjottaa Ouhluun johonki kylttuurilehteen säänöllisesti semmosta listaa, jossa hunteerathaan viis sen hetken parasta asiaa. Nykko kierrätyshommat ovva muotia, niin mie aattelin kierättää sen saman itean tähän kirjotukseen.

Pannukahvi

Isomassa pitäjässä käyessä on vaarana eksyä johonki kansainvälisseen kahvihlaan. Net tuntee siittä, että tavalista kahvia on mahottoman vaikea löytää. Vaikka sannoo tiskilä kovhaan äähneen, että ”yks kahvi”, niin ei tule ko sarjatulena lisäkysymyksiä. Otakko aislatten vai hot mokkatsinon vai päivän erikoisen Tsai latten espressoshotilla?

Koita siinä sitte parantaa artikulaatiota ja tavata hithaasti, että tavalinen kahvi piisaa. Vähinthään se kyssyy, että otakko sen kylmänä, kuumana, hetelmällisenä vai honturasilaisena tummapaahtona. Huoltoasemalla saapi vieläki pannukahvia. Yhtä sorttia.

Ei-lineaarinen telkkari

Voi niitä aikoja, ko tiesi ettei kaverille kannata soittaa kaheksalta illalla, ko sillon tullee Beverly Hills telkkarista. Sitä katoit kaikki. Vanhempi väki seurasi silmät törölä Napakymppiä ja Urheiluruutua. Koko Suomi samhaan aikhaan.

Suoratoistopalveluitten myötä voipii kattoa mitä halvaa ja koska halvaa. Minun suosikki on enklantilainen keramiikkakisa, jossa pläntäthään savea pöyäle ja tehhään siittä mitä hienompia vaasia ja kippoja. Sitä saattaa kattoa viis jaksoa yhtä soittoa eikä tarvi kuunella mainosrallia välilä.

Paksu täkki

Syyskuun alun vilposet illat ja kirpeät aamut tuntuva hapekhaan kuuhlailta kuuman kesän jälkhiin. Tullee paremin uniki, ko saapi tällätä ittensä nukkumhaan paksun täkin alle ja laittaa villasukat jalkhoin. Hikisseen ihhoon tarttuva heinäkuun lakana on jo ethäinen painajainen.

Kaveri meinasi, että viime kesä oli poka kylmin kesä tulehvaan sathaan vuotheen, niin ei passaa siittäkhään valittaa sen enempää.

Lasten apsit

Taas häätyy kehasta moternia tekniikkaa. Ennen olit aina paperinukkein vaatheet kaoksissa ja possupelin noppa missä lienee. Vesivärit sotkeennuit ja musta värinappi sotki net kaikki muut.

Nyt kläpilä on älypuhelin, jossa sillä on hyässä oortningissa Raamattu-apsi, värityspelit, lastenhoitoapsi ja hammaslääkäripeli. Jostaki avaruuspelistä se oli oppinu, miten sinkulariteetti toimii mustissa aukoissa. Sen jälkhin en ole niin sitä peliaikaa rajottanu.

Peruna

Pitkästä aikaa pääsimä karvasemman puoliskon kans elähviin kuvhiin oikhein teatterin penkile. Kävimä kattomassa Peruna-nimisen vilmin. Tai maapäärynästä siinä puhuthiin. Meilähän solis pottu. Oli kyllä rohki hauska kakstuntinen. Jos sie tykkäät nauraa, niin kokkeileppa kattoa tykkääkkö sieki.

Sivustolla käytetään evästeitä, jotta voimme varmistaa sivuston toiminnan sekä mm. kävijäseurantaan. Hyväksytkö evästeiden käytön?