Kirjoittaja: Kirsti Runavik

Ko mie olin pieni, oli meilä ratio aina päälä. Jos ei ollu, niin vintin etheisessä stereot soitit Pättinkiä ja Piitlesiä. Ysärillä Kummeli opetti telkkarissa, että kyllä artisti maksaa. Son tänä päivänä enempi ko tosi.

Moni minun komppis on tehny musiikkia koko ikänsä. Pistäny ommaa rahhaa ja aikaa siihen, että ihmiset saava kuunnella ja viilistellä. Kiertänheet pakettibiileilä Euruuppaa ja syöhneet kylmiä voileipiä takahuohneissa. 

Metalipäntien maailmale viemä musiikki on yks Suomen enniiten tunnettu vientituote. Se rakentaa tämän maan präntiä ja mainetta yhtä paljon ko joulupukki ja vormulakuskit. Niitten matkoja ei maksa Valtioneuvoston kanslia vaan oma pörsi ja ennakhoon otettu pankkilaina. Vasta sitten ko alkaa olla tosi kuulusa, saattaa saaha tueksi levy-yhtiön, jonka työntekijä hommaa lentoliput, tilataksit ja kunnon ruokapaikat. Niitten kulut kyllä perithään kiertuheen tuotoista päältä. 

Hulluiksi niitä on ruukattu kuttua. Sanottu, että kyllä on kansalinen häpeä jos tuomonen Loorti mennee Euroviissuin. Että helvetti jäätyy. Sitte ko se mennä pamhautti ja voitti koko homman, oliki se yhtäkkiä kaikkien paras kaveri ja net annoit maapläntinki sen nimhiin keskeltä Rovaniemen raittia. ”Met voitima Viisut” sanova kulttuuritantat, jokka ei kuitenkhaan ostanheet yhtään Loortin alpumia tai tukehneet sitä yheläkhään eurola. Ko artisti maksaa itte.

Jos minun komppikset olisit turvetuottajia, saisit net nyt soppeutumisrahhaa siihen, että niitten työt pittää hiljalheen lopettaa vuotheen 2030 mennessä. Turve antaa työpaikan 2500 ihmisele. Musiikki- ja tapahtumatuotanto tarjoaa työpaikan 140 000 ihmisele, eikä net ole saanu penniäkhään, vaikka työt loppu varottamatta yhessä päivässä. 

Tutut vestarirakentajat ovva siirtynheet lava- ja äänitekniikasta rakenusalale tekheen taloja. Mailmaa kiertänheet pändit menheet konkurssiin, myyhneet soittimia ja keksinheet jotaki hanttihommia. Keikkapaikat häätyvä lopettaa. Aika monela on täys tenkkapoo, että mistä sitä leipää saapi pöythään, ko lomhautetut ovva napahneet pätkätyöt eikä jokhanen voi jakkaa yölä mainoksia polkupyörälä. 

No mitä met voima sitte tehä? Jos sieki tykkäät kuunela ratiota tai huuattaa Spotifaista kappalheita, niin tue sitä lempiartistia. Osta sen paita netistä. Laita sille lahjotuksena kymppi Bandcampissa. Jos oikein villiinnyt, niin osta vaikka oikea levy. 

Suomele tuli viime viikolloppuna Euroviisuissa raskaala musiikilla kaikkien aikojen toiseksi paras sijotus. Puolitoista miljoonaa suomalaista möllötti kattoa ohjelmaa. Toivottavasti ees muutama niistä kiittää hyvin menestynyttä orkesteria oikeala rahala. 

Sivustolla käytetään evästeitä, jotta voimme varmistaa sivuston toiminnan sekä mm. kävijäseurantaan. Hyväksytkö evästeiden käytön?